係一個指標？係一份認證？係一個目標？
同朋友討論呢一個話題，引伸咗好多個矛盾，好多個心態上嘅問題，而最後都冇一個標準答案，或者結論
事沿係我一個已考咗五級嘅個學生，想結他可再上一步，想將下個目標放喺八級考試；呢件事好理性，學習，練習，進步，目標，好好嘅方向，聽落好似冇咩問題
咁我首先講一講我個學生大概去到咩程度，如果佢打開八級考試書，揀3首歌出嚟，佢聽多啲果幾首歌，對住份譜肯慢慢數下啲拍子，喺我完全唔輔助之下，都應自己可攪得掂，先唔理考試嘅其他部份，閱讀樂譜同彈奏嘅能力大概係咁
聽到呢度，都好似冇咩問題丫，仲要感覺幾好，只要學埋其他部份，就掂晒啦，佢要合格，我覺得對佢嚟講唔係咩難事
而我就對呢個位有啲…唔識點形容
我話揀3首出嚟，自己攪得掂，故知然係好，但點解唔係揀任何一首都得？
揀metal，rock，佢自己攪得掂，但揀另外嘅style嘅話，我個學生對住份譜就投晒降
問題就係喺呢度啦，咁考試範圍係考3首歌，
咁識點彈3首就得？
定係任何一首都彈倒，然後先再揀自己鐘意嘅去考呢？
呢個題目就已討論到天昏地暗，當然冇答案，但都好值得思考一下
題目一直引申到考試係為乜？有張8級可去教下結他？目標係進步定証書？如果想進步係目標嘅話，我問點解唔可以定每首都可彈倒做目標？
考3首自己應付倒嘅歌，有啲style完全唔掂，可考得到証書，完成咗目標；與學識晒每首唔考，係達到進步嘅目標，所以我覺得目標係証書定係進步，已係兩件唔同嘅事
咁我又問咁如果個學要學果幾首，個阿sir連點數果啲拍子都唔識咁點算？但有8級証書喎，咁啲朋友就話，咁學果個人自己係應該要知自己個老師係邊個style強嘅人，先去跟佢學咖啦；又好似有啲道理咁，的確音樂嘅style太大，係好複雜嘅問題
好想知大家點睇，雖然冇實質答案，但應該個個人嘅睇法都唔同，大家討論下
考倒證書等於進步？ 操練考證書呢個過程就已經係會進步？ 證書從來都唔理，彈到就開心就OK？ 人哋嘅要求係三首歌，唔好理其他彈成點？ 應該要全部都識彈嘅？
每個題目都變咗無限個問題出現