其實呢一個問題，有好多人問過 除咗呢
一個問題，佢哋都問咗好多唔同嘅相關問題，我哋就發現，對呢一個行業有興趣嘅人其實唔少，但係對呢個行業嘅了解就應該未夠 多
剛剛開始學彈結他冇耐，對結他維修有興趣，可以向呢個行業發展嗎？ 呢一個問題，其實分咗幾個層次， 第一，彈奏同維修嘅關係 第二，有興趣 第三，發展
一，需要懂得彈奏 結他維修呢一個項目，有一個好大嘅特點，並唔係結構性啱就得嘅一個工作，舉一個例子：「基本上」每一件零件都配搭啱，火箭就能夠升空，而結他每一個配件配搭啱就能夠有聲 每一件零件嘅結構配對啱係第一個條件，火箭升空要考慮嘅仲要考慮埋，唔同天氣、唔同嘅因素同情況，要照顧到人嘅安全 彈結他當然唔能夠同火箭作比較，而要照顧嘅情況不一樣，而要考慮嘅最重要因素係～彈奏者嘅手感，同埋玩咩類型嘅音樂 所以如果自己冇彈奏結他，對手感嘅敏銳亦會不足夠，同埋難以理解演奏這需要嘅嘢 所以由我嘅角度去睇，要有一定了解彈奏係需要的，有齊所有嘅工具，將一支結他set到「正確」一啲都唔難，難嘅係配合使用者嘅需要，呢一個先係精粹所在
二，興趣 我哋係非常之鼓勵任何人用興趣作為自己嘅工作，寄工作於娛樂 我哋都花上左好多年嘅時間，發現自己對一樣野真係好有興趣，先會行到某一步，作某一個決定，先會成為今天的我地 而我哋自己亦都好清楚，人生中有好多個興趣出現過，但就只係出現過，其實係唔真實的 我哋鼓勵嘅係，當你真係搵到你想要嘅嘢，就應該放手去做，先決條件係，你已經準備好，決定好，知道呢一樣係你想要嘅嘢 再者，係呢一個好現實嘅香港，真係個金錢嘅世界，要從事呢個行業，要有一份覺悟，係真係搵唔到錢係事實，你要確定自己係唔係可以由朝做到晚，只係夠食飯、搭車 如果你真係好喜愛呢個事情，咁就唔需要擔心呢啲，有時幻想自己做到，同自己真係做到，係兩件好唔同嘅事
有第二個條件支持之下，就會可以出現第三點～發展 發展呢一個詞語，好似同商業好有關係，我諗亦都係我哋最弱嘅一環，我哋真係唔知道有冇人會投資呢一個行業，會諗住將呢一個行業發展到咩程度，首先起碼我哋自己唔識，亦唔覺會有，如果係一門可以變錢嘅生意，我諗香港人一早已經令到佢好蓬勃 我哋好隨性，純粹開心，好玩就去做，想拍下片就拍，想介紹啲野比人知就介紹下，只係用最單純嘅想法，諗住只要做啲嘢做得好，不停去搵性價比好嘅產品返黎，啲人知就會黎咖啦，咁就已經係我地嘅發展大計，我諗其他人嘅發展大計應該比我哋好好多 我地暫時冇諗過，亦都冇能力可以請到一個學徒，但如果你真係對呢個行業有興趣，我相信你會去深入咁研究同了解結他，會搜尋不同的相關資料，增加自己嘅認識 計劃追唔想改變，先做好現在呢一步，下一步就會自然發生