結他換fret～～ 算係一件好多工序嘅工作之一，而未講工序，先應講有冇需要去做，因為有好多客人都誤會咗，以為自己支結他需要換fret，例如痴fret，原因有好多，而好多時都同換fret其實冇關係；另外有啲fret彈凹咗，就以為必須更換，其實都未必一定係咁，所以遇到呢啲情況大家唔好太過擔心，先去了解係咪真係有需要先
第一步～拆fret 用把口講，係好易的，用個鉗，鉗起去，完～ 當然唔係咁簡單啦，有好多野需要去衡量，最簡單就係究竟佢有冇膠水黐住啦，原本佢裝落去有幾實啦，而拆出嚟嘅過程裏面一定要慢慢啦，唔可以隨便用力就拆出嚟啦，要一下一下退佢出嚟，加油💪🏻，將呢個動作重複20幾次 第二步～做返平fingerboard面 拆咗啲fret出嚟,係要磨平返呢個fingerboard面,因為呢一個表面經過歲月嘅洗禮，其實已經唔再平滑，而finger board平唔平係好緊要，一定要做返平先得㗎，咁當然要跟返個弧度啦 第三步～清木硝 拆咗啲Fret出嚟，其實每條坑之間係會埋藏咗一啲好細好細嘅木硝，係需要每一條逐條逐條清返乾淨，同埋每一條坑嘅深度都要留意，係咪可以適合安裝新嘅fret 第四步～裝 每條fret要做返相應嘅弧度，先至可以裝返落去，如果比着以前，做呢一樣野都幾麻煩，就算你有工具裝咗啲fret落去，啲fret同你女友一樣，係唔會貼貼服服的，咁所以就要令佢貼貼服服～就係揼柒佢，你要用力，但係唔好重手，自己要就住，唔係就gg了 依家就出咗好多新嘅工具幫手，呢個舉動都變得輕鬆咗啲嘅 第四步～剪 裝咗落去之後，會預長左啲要黎剪，其實呢一部份我覺得係最高難度，如果平時有彈開結他，而會留意到手工好唔好的話，呢一個部份係好重要，直接影響到彈奏者個手感，剪得出就會刮手，剪得入旁邊就會有凹凸嘅手感，同埋會剪到隻手好攰好痛 最後～修邊 而最後就要收復番個邊位，咁先會有舒服嘅彈奏感覺，都係果句好易嘅啫，逐格逐格慢慢挫就得㗎啦