《追求進步嘅慾望》

年紀越嚟越大,覺得自己進步越嚟越慢,又或者直頭係冇再進步?

年紀開始大,可能係其中一個原因,但係咪真係真正根本嘅原因?

而眾多原因當中,當然包含好多因素;而我覺得有一個因素先係最重要~~


「對於追求進步嘅慾望,夠唔夠大!」


見到人哋進步嘅時候,人哋花咗幾多時間去學習,自己係擺咗幾多時間去學習呢?


咁人哋學習完,花咗幾多時間去練習,自己係攞咗幾多時間去練習呢?


咁人哋練習嘅時候,係認真對待每一個練習,開個拍子機去練,自己係咪彈過下就又當練咗呢?


咁人地練嘅時侯,係真係專心專注嘅,自己又有冇覆下信息,又睇下電視咁練呢?


人哋喺聽歌嘅時候,除咗relax外,係嘗試聽緊啲乜嘢、理解緊啲乜嘢,自己係聽緊啲咩嘢呢?


人哋係討論緊音樂,嘗試令自己理解多啲、知道多啲嘅時候,自己又同其他人討論緊啲乜嘢呢?


人哋行路搭車,都諗緊點可以彈得好啲嘅時候,自己又諗緊啲咩呢?


其實由頭到尾都係一個態度嘅問題,有幾想嘅問題,係對自己想要嘅嘢慾望有幾大嘅問題;有冇想進步嘅態度,有冇想進步嘅行動

如果同其他人比較結果嘅時候,不如試吓先比較自己嘅態度同埋行為,究竟自己有冇對進步有足夠嘅熱情呢?


其實唔一定係音樂,做每一個範疇嘅事,其實都係同樣,邊啲係藉口,邊啲係實質原因,自己判斷到嘅

4 views0 comments